Ùrachadh mu Dheireadh 01/02/2018
 
>
Duilleag de 1
<

Còmhdhail

Còmhdhail

Aig toiseach an 18mh linn bha a' Ghàidhealtachd fhathast doirbh faighinn thuice agus doirbh a dhèanamh sìtheil. Bhiodh daoine a' siubhal dhen cois no ann am bàta (b' e a' bhìrlinn am bàta a bhiodh air a chleachdadh sna h-amannan tràtha.)

Ròidean Wade
Às dèidh Ar-a-mach nan Seumasach ann an 1715, chuireadh an Seanalair Wade gu tuath airson gun togadh e ròidean a leigeadh le saighdearan an Riaghaltais gluasad gu furasta tron Ghàidhealtachd. Ann an 1730 bha a' chiad rathad aig Wade air a chrìochnachadh; bha e a' dol eadar Sruighlea agus Inbhir Nis, a' dol tron Ghleann Bheag faisg air Craoibh agus suas seachad air Bealach Dhruim Uachdair. Thàinig ròidean eile às dèidh sin a bha a' ceangal ghearastanan Loch Abar, Chille Chuimein agus Dhùn Sheòrais. Gu h-ìoranta, chuidich na ròidean ùra am Prionnsa Teàrlach 's e a' dèanamh mèarrs gu deas ann an 1745.

Cuideachadh Thelford
Chaidh ròidean Wade bhuapa ann an ùine ghoirid ged-tà leis nach deach an cumail suas. Dh'atharraich sin nuair a ràinig Tòmas Telford ann an 1801. Fo stiùireadh Thelford thog an Riaghaltas cidheachan agus drochaidean ùra agus còrr is 875 mìle (1,408km) de ròidean ùra leasaichte eadar 1803 agus 1821.

Rè na h-ùine seo bha Telford cuideachd os cionn sgeama adhartach gus an Cuan a Tuath agus an Cuan Siar a cheangal ri chèile. A dh'aindeoin dhuilgheadasan mòra mòra, chaidh crìoch a chur air a' Chanàl Chailleannach eadar Inbhir Nis agus a' Chorpaich ann an 1822.

Teachd nan ròidean iarainn
Chaidh na sgilean aig innleadairean, luchd-tomhais agus luchd-saothrachaidh fheuchainn a-rithist na b' fhaide dhen linn nuair a thàinig na ròidean iarainn dhan Ghàidhealtachd. Nuair a chaidh an rathad iarainn eadar Peairt agus Inbhir Nis fhosgladh ann an 1865 bha obair air tòiseachadh mu thràth air loidhne gu tuath air Inbhir Nis. Chaidh crìoch a chur air Loidhne a' Chaoil ann an 1897 agus an uair sin Loidhne Taobh Siar na Gàidhealtachd eadar Glaschu agus Malaig ann an 1901.

Còmhdhail san 20mh linn
Tha piseach mhòr air tighinn air ròidean o àm an Dàrna Cogaidh. Gu ìre mhòir tha ròidean dùbailte ann an àite nan seann ròidean singilte, ged a tha àite cumhang no dhà ann fhathast ri chur air dòigh. Tha drochaidean Cheiseig, Chrombaidh agus Dhòrnaich air an ùine a tha e a' toirt siubhal gu tuath a ghiorrachadh gu mòr. Tha drochaidean an Eilein Sgitheanaich agus a' Chaolais Chumhaing air àite slighean aiseig a ghabhail ged a tha seirbheisean aiseig fhathast a' dèanamh ceangal deatamach da-rìribh ri na h-eileanan. Tha na h-aiseagan air a bhith gu math nas cofhurtaile agus a' ruith nas trice anns na bliadhnachan mu dheireadh.

Tha an sgìre cuideachd air buannachd fhaighinn o thòisich seirbheisean adhair cunbhalach. Tha ceangal dìreach eadar raointean-laighe air grunn eileanan beaga agus na puirt-adhair ann an Inbhir Nis, Steòrnabhagh, Lèiruig, Baile na h-Eaglais, Inbhir Uige agus Glaschu.

Ann an 1844 thug e fad dà latha siubhal air coidse eadar Inbhir Nis agus Peairt. An-diugh nì an trèana an t-slighe ann an dà uair a thìde; agus bheir plèana luchd-siubhail a Lunnainn à Inbhir Nis ann am beagan is uair a thìde. Abair gu bheil cùisean air atharrachadh!

20 Toraidhean


Ìomhaighean: 83Adhar
Ìomhaighean: 307Bàtaichean - Aiseagan
Ìomhaighean: 77Bàtaichean - coitcheann
Ìomhaighean: 72Canàlaichean
Ìomhaighean: 349Calachan & Cidheachan
Ìomhaighean: 19Rathaidean Armailteach
Ìomhaighean: 136Rèile - Drochaidean
Ìomhaighean: 243Rèile - Coidseachan
Ìomhaighean: 1755Rèile - Carbadan-smùide
Ìomhaighean: 263Rèile - Stoc Rèile Eile
Ìomhaighean: 768Rèile - Trèanaichean
Ìomhaighean: 243Drochaidean-rathaid 
Ìomhaighean: 245Rathaidean

>
Duilleag de 1
<
Airson stiùireadh mu bhith a’ cleachdadh ìomhaighean agus susbaint eile, faicibh duilleag ‘Na Cumhaichean air Fad.’
’S e companaidh cuibhrichte fo bharantas clàraichte ann an Alba Àir. SC407011 agus carthannas clàraichte Albannach Àir. SC042593 a th’ ann an High Life na Gàidhealtachd.
Powered by Capture