Sealladh bàigh, Dùrar, Apainn

'S e gleann beinne farsaing a tha a' dol sìos gu ruige Na Linne Sheileach air costa an iar na h-Apainn a th' ann an Gleann Dùrar. 'S ann ann a rugadh Seumas Stiùbhart - Seumas a' Ghlinne - a chaidh a chrochadh airson bàillidh Loch Iall, Cailean Caimbeul à Gleann Iubhair a mhort ann an 1752. 'S e 'Mort na h-Apainne' a chaidh a thoirt air an seo agus chun an latha an-diugh, tha teagamh ann mu ciont Sheumais Stiùbhairt. Chaidh na thachair a dhèanamh ainmeil le Raibeart Louis Stevenson anns an leabhar 'Kidnapped'. <br /> <br /> Chaidh an sealladh bàigh seo a-null chun nam beanntan aig Dùrar a thogail le M.E.M Donaldson anns a' chiad leth dhen 20mh linn.<br /> <br /> Rugadh Màiri Ethel Muir Donaldson, ann an 1876 agus thàinig i chun na Gàidhealtachd mu 1908. Shiubhail i mun cuairt ceann a tuath agus taobh an iar na Gàidhealtachd, a' sgrìobhadh agus a' togail dhealbhan. B' e Àird nam Murchan fear dhe na h-àiteachan a b' fheàrr leatha agus b' ann an sin a rinn i a dachaigh, ann an Sanna, ann an 1927.<br /> <br /> Eadar 1912 agus 1949 rinn i iomadach leabhar air eachdraidh sòisealta agus cleachdaidhean an t-sluaigh ann an ceann a tuath agus taobh an iar na Gàidhealtachd. 'S iad 'Wanderings in the Western Highlands and Islands' agus 'Further Wanderings - Mainly in Argyll' an dà leabhar as ainmeile a rinn i agus tha a dealbhan fhèin anns na leabhraichean sin. Dh'eug i ann an dachaigh-cùraim ann an Dùn Èideann ann an 1958 agus chaidh a tiodhlacadh anns an Òban. <br /> <br /> <br /> Faodar an dealbh seo a cheannach.<br /> Airson tuilleadh fiosrachaidh mu cheannach is prìsean, cuir post-d gu: <a href="mailto: photographic.archive@highlifehighland.com">Highland Photographic Archive</a>