’S e coimhearsnachd sgapte ann an iar-thuath an Eilein Sgitheanaich a th’ ann an Cealabost, a tha a’ coimhead dhan ear thar Loch Dùn Bheagan. Tha an taigh-tughaidh san dealbh na fhear de bhuidheann bheag de thogalaichean air an cur air dòigh le Peadar MacAsgaill ann an 1969. ‘Sa bhuidhinn tha taigh-croite agus dà bhothag-tughaidh, le samhla de phoit-dhubh neo-laghail ann an tè dhiubh. San taigh-croite tha teine am meadhan an làir far am biodh an ceò a’ faighinn às tron tughadh no tron t-similear gu h-àrd. Bha na taighean dubha seo, air an togail le dà rùm, a-riamh dorch agus ceòthach ach bhiodh iad cuideachd a’ dèanamh fasgaidh glè mhath an-aghaidh nan siantan.