Stèisean Achadh na Sìne - a' dèanamh iomlaid air carbad-bìdh 2

Aig Achadh na Sìne, bhithte a' gluasad a' charbad-bìdh on trèana dhan Chaol aig àm dìnnearach chun na trèan gu Inbhir Nis. Tha na dealbhan seo a' sealltainn na bha tachairt. Tha an t-einnsean aig an trèana gu Inbhir Nis air dealachadh on trèan. 'S e einnsean Stanier Black 5 a b' àbhaist a bhith aig Rèile Lunnainn, Meadhan-tìre agus Alba (seòrsa ris an canadh na Gàidheil 'hikers') a th' anns an einnsean. Nochd an seòrsa seo air Rèile a' Chaoil ann an 1946 an dèidh dhan chlàr-tionndaidh ann an Caol Loch Aillse a bhith air a leudachadh gus an gabhail, agus bha iad air an cleachdadh gus an do thòisich einnseanan dìosail tràth anns na 60an.<br /> <br /> Tha Stèisean Achadh na Sìne air Rèile Inbhir Pheofharain agus an Eilein Sgitheanaich, ris an canar mar as trice an-diugh Rèile a' Chaoil. Tha e beagan is 43 cilemeatair an iar air Inbhir Pheofharain. Dh'fhosgail e do bhathar air an 9mh dhen Lùnastal 1870, agus do luchd-siubhail air an 19mh là. Tha e fhathast fosgailte ann an 2008, ach sguir trèanaichean bathair anns an Lùnastal 1983. 'S e Achadh na Sìne fear de na lùban far am faod trèanaichean dhan ear 's dhan iar a dhol seachad air a chèile. Bha taigh-òsta aig an stèisean ach chaidh a losgadh gu làr anns a' Ghearran 1994