Port Rìgh bhon Mheall

Tha 'Meall na h-Acarsaid' far an deach an dealbh seo a thogail a nochdadh air cuid de sheann mapaichean mar Fancy Hill, 's dòcha bho na gàrraidhean chraobhan agus phreasan air an cur timcheall an tùir. A rèir aithris 's e Dr Alasdair MacLeòid, an Dotair Bàn, a thog an tùr 's a chuir dreach air an tìr sna 1830an nuair a bha e na bhàillidh aig treas Morair nan Dòmhnallach, Sir Godfrey. Tha an t-ainm The Lump nas cumanta a-nis air a' Mheall ged nach eil e idir cho càilear. <br /> Anns an deilbh seo, is iad an Taigh-òsta Rìoghail, clì air meadhan na deilbhe air cùl na craoibhe, agus na Gladstone Buildings na prìomh toglaichean a chithear. Air stuadh nan toglaichean Gladstone tha soidhne air a bheil "The General Stores J.G. MacKay". Rugadh John Gunn MacKay ann an Loch Aillse ann an 1849. Bha a mhàthair às an Eilean Sgitheanach agus bha athair na mhaighstir sgoile à Cataibh. Às dèidh dha a bhith soirbheachail mar cheannaiche-aodaich ann an Glaschu, rinn e imrich a Phort Rìgh ann an 1885 agus dh'fhosgail e na General Stores air Bràigh a' Chidhe, faisg air a' chala. Tha an t-ainm Gladstone Buildings na chomharra air poileataics MhicAoidh. Bha a làn-thaic ri Comann an Fhearainn agus ri còraichean nan croitearan, cho math ri gnothaichean na Gàidhlig agus iomain. Bha e na eòlaiche cuideachd air Cinnidhean na Gàidhealtachd agus air breacan. <br /> <br /> <br /> S dòcha gum bi an ìomhaigh seo ri faotainn airson a ceannach.<br /> Airson tuilleadh fiosrachaidh mu cheannach is prìsean, cuir post-d gu: <a href= "mailto: skyeandlochalsh.archives@highlifehighland.com" >Skye and Lochalsh Archives</a><br />