Thathar den bheachd gun deach Eilean Donnain ainmeachadh às dèidh an Easbaig Donnain, naomh Èireannach a thàinig a dh'Alba ann an 580 às dèidh Chrìosda. Chaidh a' chiad structair daingnichte a thogail air an eilean san trìtheamh linn deug, aig an àm a bha an sgìre fhathast fo chumhachd Triathan nan Eilean. Chaidh an caisteal seo a thogail ann an suidheachadh aig an robh cudromachd ro-innleachdail gus na Lochlannaich a chumail air falbh, oir bha iad le an ionnsaighean agus an ruatharan fhathast a' bagairt gu làidir orra ann an ceann a tuath na h-Alba. Thairis air na bliadhnaichean leudaich agus lùghdaich an caisteal ann am meud. Bha e na ghearasdan aig luchd-taic nan Seumasach aig àm an ar-a-mach aca san ochdamh linn deug mar fhàbhar dha Cinneadh nan Stiùbhartach, agus dh'adhbhraich a' ghnìomh seo gun deach an caisteal a sgrios. Bha Caisteal Eilean Donnain an sin na thobhta sgriosta airson faisg air 200 bliadhna gus an do cheannaich an Leifteanant Còirneal Iain MacRath-Gilstrap an t-eilean ann an 1911, agus choisrig e an ath 20 bliadhna de a bheatha gu dèanamh suas a' chaisteil às ùr. Chaidh crìoch a chur air ann an 1932.